Opat Kabagjaan Pikeun Manusa / Empat kebahagiaan Bagi Manusia

- Juli 27, 2022

Oleh : Udef D'Santri

_Bismillah_

Sadayana manusa nu kumelendang di alam dunya tangtos baé miharep kabagjaan dina kahirupanna.

Teu aya hiji ogé nu ngagaduhan karep hirupna sangsara balangsak, nalangsa tunggara.

Kabagjaan nu dipimaksad téh, tiasa kabagjaan dunia, tiasa ogé kabagjaan di akhérat jaga.

Dina enggoning ngahontal éta nu dicita-citakeun, Nabi SAW maparin pituduh ka ummatna sangkan manusa tiasa tinekanan ngawujudkeun kabagjaan :

اَرْبَعٌ مِنْ سَعَادَةِ اْلمَرْءِ أَنْ تَكُوْنَ زَوْجَتُهُ صَالِحَةً وَأَوْلَادُهُ أَبْرَارًا وَخُلَطَائُهُ صَالِحِيْنَ وَأَنْ يَكُوْنَ رِزْقُهُ فِىْ بِلَدِهِ رواه الديلمى

Opat perkara nu mangrupikeun kabagjaan hiji jalma, nyaéta :
1. Pasangan hirup nu sholéh,
2. Anak² nu ngabakti
3. Rerencangan anu sholeh
4. Rejekina di negerina nyalira (HR Dailami)

1. Ngagaduhan pasangan hirup nu sholéh/sholehah mangrupi salah sawios kabagjaan pikeun saha baé jalmina. Margi nu gaduh pasangan hirup nu Ta'at bakal nimbulkeun rasa tengtrem. Moal aya rasa timburu pasangan salingkuh, sareng bakal ngadukung kana kagiatan agama.
Tiasa ngajagi kahormatan, haté saring lisan dirina, pasanganna, tur kulawargina.

2. Anak nu saroléh mangrupi hiasan mata (Qurrota A'yuun). Hiji kabanggaan nalika ngagaduhan murangkalih sholeh/sholehah. Sukses akademis dunia teu acan karuhan tiasa ngabakti ka sepuhna. Tapi sukses urusan agama, nya ieu pisan nu bakal nyeungitkeun nami sepuhna di dunia, sarta bakal tiasa ngangkat darajat sepuhna di akherat jaga ku do'a sareng istighfar anak2na.
Sakumaha Sabda Nabi :

إن الله ليرفع الدرجة للعبد الصالح في الجنة فيقول يا رب أنى لي هذه؟ فيقول باستغفار ولدك لك

Saéstuna Allah pasti bakal ngangkat darajat hiji hamba nu sholéh di surga. Maka eta jalma naros ka Allah, Yaa Rabbii, kumaha beut tiasa kieu?

Maka Allah ngawaler : (éta téh) alatan istighfar anak² anjeun pikeun anjeun. (HR Ahmad).

Pami urang ka surga téh mung saukur kelas ékonomi, ku Istighfar anak nu sholéh mah mungkin tiasa waé kedudukan urang di surga téh janten kelas VIP.

Sanaos kitu, 2 kriteria diluhur nembé meryogikeun peran vital urang kanggé ngadidik anak sareng pasangan urang supados janten jalmi nu sholéh tur ngabakti. Sarta ngadidik teu tiasa ngadadak.

3. Réréncangan nu sholéh

Aya keterangan nu nerangkeun yén sosohiban (pergaulan) téh sok maling kalakuan. Gaul sareng tukang parfum, bakal kacepretan seungitna, gaul sareng tukang daging, bakal katépaan hanyirna. Pergaulan ageung pisan pangaruhna. Sarta pami urang lepat bergaul, ageung kamungkinan bakal kacandakeun.

Numawi kitu, apik² dina milih réréncangan, ulah lepat gaul, anu antukna urang kacandakeun teu leres. Ngagaduhan réréncangan nu sholéh mangrupi 1 kabagjaan pikeun urang, kumargi nalika urang milampah salah, bakal aya nu ngélingan, nalika urang labuh bakal ngahudangkeun, nalika poho bakal diingetan. Réréncangan nu sholéh salamina bakal nungtun urang kana jalan kataatan. Benten sareng réréncangan nu rujad akhlakna, tangtosna bakal ngagebruskeun urang kana jalan katunggaraan.

4. Rejeki di negeri na nyalira.

Hujan batu di negeri sendiri, lebih baik dari hujan emas di negeri orang.

Hartosna, milari rejeki salami tiasa di negeri (daerah) nyalira mah langkung saé, Batan ka negeri batur. Di negara batur mah bisa karuhan. Sedengkeun di negara nyalira mah dampak madlorotna langkung alit.

Sanés teu kéngéng milari rejeki kaluar, nanging salami tiasa mah langkung nyugemakeun tiasa milari rejeki di nagara nyalira. Kulawargi bakal katalingakeun, ka-atik tur kaatik.

Opat Kriteria diluhur tinangtos meryogikeun ikhtiyar sangkan manusa tiasa ngahontalna. Ikhtiyar nu paling utami mah nyaéta bentuk heula pribadi nyalira sangkan janten jalmi nu taqwa ku cara taqorrub ka Allah SWT. Saparantosna kitu, aplikasikeun adab nu saé minangka buah tina kataqwaan, margi tuladan (Uswah) nu bakal janten eunteung kanggé sing saha baé nu wanoh sareng dirina.

Cag..