BOBOTOH MASJID
 |
| BOBOTOH MASJID |
Ropeaan : Udef D'Santri
Sok resep pami ninggal Bobotoh di stadion pagelek-gelek nalika tim kabanggaanna nyaéta Persib Bandung tandang makalangan.
Panitia Pelaksana (Panpel) Liga Indonesia 2020 nguningakeun yén sekitar 25.000 lambar tikét disayogikeun nalika aya bahkan Persib maén. Rata² 20.000 - 24.000 tikét laris kajual kalayan rincian harga tikét :
VIP Barat Utama - Rp 125.000
VIP Barat I - Rp 100.000
VIP Barat II - Rp 100.000
Timur - Rp 60.000
Utara / Selatan - Rp 50.000
*(Data Tribun Jabar Februari 2020)
Tiasa kabayangkeun penghasilanna sabaraha setiap kali Persib maén. Pami digitik rata ku pangaos 80.000 /tikét, dikali minimal bobotoh nu hadir 20.000 = 1.600.000.000,-
Upami Sapekan 2 kali Persib maén,
Berarti penghasilan rata²na Rp. 3,2milyar/pekan .
Pami Persib maén jam 16.00, Bobotoh ti jam 14.00 kénéh tos Manco di stadion. Mulih téh minimal jam 18.00, (kalkulasi waktos nu diperyogikeun sekitar 4jam)
Bobotoh nu teu mésér tikét mah ku Panpel dicaram lebet ka stadion.
Tos dilebet stadion, katuangan sareng leueuteun kedah mésér.
Di stadion téh kapanasan, kahujanan, ajrag-ajragan, jojorowokan, pasesedek, kacipta capéna.
Simkuring sakapeung mah sok ngabayangkeun, cobi upami pengorbanan bobotoh nu sapertos kitu téh ka masjid.
Moal aya masjid nu sepi. Moal aya masjid nu katalangsara. Ustadz sareng santri na bakal hurip kahirupanna.
Teu muluk-muluk 3,2milyar/pekan, 10%na wéh 320juta/pekan.
Urang cobi bandengkeun ripuh mana ka stadion sareng ka masjid :
1. Ka stadion mah kedah mayar tikét, ka masjid mah henteu.
2. Ka stadion mah waktos nu diperyogikeun dugi ka 4 jam, ka masjid mah paling lami sajam.
3. Ka stadion mah pangaos tikét ditangtoskeun, ka masjid mah ngalebetan kotak amal sa-ridhona.
4. Ka stadion mah teu mésér tiket teu kénging lebet, ka masjid mah badé ngisi kotak amal badé henteu gé tiasa lebet.
5. Di stadion mah ripuh, ajrag-ajragan, jojorowokan, kapanasan, kahujanan. Di masjid mah calik, ngadangukeun ustadz ceramah, sakapeung mah bari nundutan 😁, adem, teu aya kantos kawartoskeun nu kaluar ti masjid bobolokot késang alatan kacapéan ibadah.
6. Artos kanggé tikét stadion mah ngabeungharkeun batur, artos kanggé kotak amal masjid mah kanggé urang kénéh jaga di akhérat.
7. Tuangeun sareng leueuteun di stadion mah kedah dipésér, dimasjid mah kadang sok disuguhan.
8. Di stadion mah nu mabok, nu nyarios kasar, nu tawuran, kantenan pami tim nu didukungna kawon, sok murang maring. Di masjid mah tebih pisan tinu karitu téh.
9. Nalika Persib juara, urang mah teu ka bagéan piala, nanging nalika urang sumanget ibadah, tiasa ngungkulan syétan, seueur pisan hadiah piala ti Alloh nu bakal katampi ku urang.
10. Bangku VIP di stadion mah awis, VIP di masjid mah kantun tangian urang sumping jum'atan. Maka Alloh ngajanjikeun VIP shaf kahiji pahalana lir qurban ku onta,
VIP shaf kadua pahalana lir qurban ku sapi, Sst.
Hayu bobotoh ah!! urang beungharkeun masjid, daripada ngabeungharkeun nu tos beunghar mah.
Urang pésérkeun artos téh kanggé tikét akhérat, sampeureun jagi di akhérat. Pami tos di masjid mah geura, bakal langkung betah tibatan di stadion.
Harta, kacapé, waktos, dukungan sareng sanéskanten pengorbanan nu dilakukeun di stadion mah kanggé batur. Urang mah ngan sakur kéngéng kapuasan gé pami nu didukungna aya dina kaunggulan. Di masjid mah sadaya pengorbanan urang kanggé urang deui.
Ngamakmurkeun stadion mah teu gratis, ngamakmurkeun masjid mah gratis gé tiasa, sarta mangrupi ciri jalmi nu iman.
Bari janji Allah mah pahala nu kalintang nyugemakeunana nalika urang tiasa ngamakmurkeun masjid.
Allah Ta'ala nimbalan :
“Taya lian nu ngamakmurkeun masjid - masjid Allah téh nyaéta jalmi -jalmi nu iman ka Allah sareng dinten wawales..." (At-Taubah : 18)
مَنْ بَنَى لِلَّهِ مَسْجِدًا بَنَى اللَّهُ لَهُ مِثْلَهُ فِي الجَنَّةِ
“Sing saha waé jalmina nu ngawangun masjid karna Allah, maka Allah bakal ngawangun nu samisal di syurga” (HR. Tirmidzi no. 318 dan Ibnu Majah no. 736, shahih).
Komentar
Posting Komentar
Nama :
Alamat :